भारताचे सरन्यायाधीश भूषण गवई यांच्या हस्ते नाशिक जिल्हा न्यायालयाच्या नवीन इमारतीचे उद्घाटन २७ सप्टेंबरला !

भारताचे सरन्यायाधीश भूषण गवई यांच्या हस्ते नाशिक जिल्हा न्यायालयाच्या नवीन इमारतीचे उद्घाटन २७ सप्टेंबरला !

नाशिक : नाशिक जिल्हा न्यायालयाच्या नवीन आधुनिक इमारतीचे उद्घाटन २७ सप्टेंबर रोजी भारताचे सरन्यायाधीश न्यायमूर्ती भूषण गवई यांच्या हस्ते होणार आहे. या कार्यक्रमाला राज्याचे मुख्यमंत्री देवेंद्र फडणवीस, उपमुख्यमंत्री अजित पवार, एकनाथ शिंदे, मुंबई उच्च न्यायालयाचे मुख्य न्यायमूर्ती चंद्रशेखर तसेच अनेक मान्यवर उपस्थित राहणार आहेत. अशी माहिती आज पत्रकार परिषदेत नाशिक जिल्हा वकील संघाचे अध्यक्ष ॲड. नितीन ठाकरे यांनी दिली. या परिषदेस महाराष्ट्र व गोवा वकील परिषद सदस्य ॲड. जयंत जायभावे, नाशिक जिल्हा वकील संघाचे उपाध्यक्ष ॲड. वैभव शेटे, सहसचिव ॲड.संजय गिते, ॲड.सोनाल गायकर, खजिनदार ॲड.कमलेश पाळेकर आदी उपस्थित होते. 

नाशिक जिल्हा न्यायालयाची स्थापना सन १८८५ मध्ये झाली. जुन्या दगडी इमारतीनंतर सन २००५ मध्ये न्यायालयासाठी नवीन इमारत उभारण्यात आली होती. मात्र खटले, वकील व न्यायाधीशांची संख्या वाढल्याने न्यायालयाच्या विस्ताराची आवश्यकता भासली. वकील संघाच्या पाठपुराव्यामुळे न्यायालयासाठी अडीच एकर जागा उपलब्ध झाली. सन २०२० मध्ये राज्यस्तरीय वकील परिषदेच्या वेळी या जागेवरील पाच लाख चौ. फुटांच्या नव्या इमारतीचे भूमिपूजन तत्कालीन सरन्यायाधीश शरद बोबडे व तत्कालीन मुख्यमंत्री उद्धव ठाकरे यांच्या उपस्थितीत झाले होते. न्यायमूर्ती भूषण गवई व न्यायमूर्ती अभय ओक यांच्या खंबीर पाठिंब्यामुळे केवळ चार वर्षांत हे बांधकाम पूर्णत्वास आले.

***************************************

कशी असेल इमारत ?

             जिल्हा न्यायालयाची देशातील पहिलीच अशी भव्यदिव्य सात मजली इमारत ज्यात तब्बल ४५ न्यायदान कक्ष, ७०० लोकांची आसनक्षमता असणारे सभागृह, बहुमजली वाहनतळ ज्यात एकाचवेळी ५०० चारचाकी आणि १००० दुचाकी वाहने उभी करता येतील. या आणि इतर अनेक अद्ययावत, आधुनिक सुखसुविधा युक्त प्रकल्पाचे बांधकाम फेब्रु. २०२० सुरू करण्यात आले. मात्र ३५० कोटी रुपयांत हा बहुआयामी प्रकल्प उभारण्यात आला आहे ज्यामुळे जिल्हा न्यायालयात एकाचवेळी ७५ न्यायदान कक्ष, जवळपास ४००० वकील आणि हजारो नागरिकांना सुविधा उपलब्ध होतील.

सुमारे ३१० कोटी रुपयांचा खर्च करून बांधण्यात आलेली ही इमारत अत्याधुनिक सुविधा असलेली आहे. या लोकार्पण सोहळ्याचे आयोजन जिल्हा न्यायालयालगतच्या पोलीस ग्राऊंडवर करण्यात आले असून तेथे सुसज्ज आसनव्यवस्था करण्यात आली आहे.

या कार्यक्रमासाठी लोकप्रतिनिधी, नागरिक, पत्रकार, वकील व न्यायाधीश यांना निमंत्रित करण्यात आले आहे. नाशिककरांनी मोठ्या संख्येने उपस्थित राहून या ऐतिहासिक सोहळ्याची शोभा वाढवावी, असे आवाहन आयोजकांतर्फे करण्यात आले आहे.