कवयित्री अलका कुलकर्णी यांची आषाढी स्पेशल रचना "चंद्रभागे तिरी"
चंद्रभागे तिरी...
साजिरे सगुण रूप विठू सावळा
चंद्रभागे तिरी रंगलाय सोहळा...!
नाम घोष पांडुरंग वारी पंढरी
वाजतो मृदंग आणि टाळ तुतारी !
झाले देहभान दंग लागला लळा
चंद्रभागे तिरी रंगलाय सोहळा... !!
आल्या स्वागतास पावसाच्या सरी
वारकरी नाचे धुंद तालावरी !
बहरला जणू सावत्याचा मळा
चंद्रभागे तिरी रंगलाय सोहळा... !!
भक्ती हेच कर्म आणि ध्यास अंतरी
हरी भजनात दंग वारकरी !
भाळावर शोभतोय कस्तुरी टिळा
चंद्रभागे तिरी रंगलाय सोहळा... !!
दारी आले भक्त तू उभा विटेवरी
ओढ लागली कधी दिसेल पंढरी !
खांद्यावर वीणा माळ तुळशी गळा
चंद्रभागे तिरी रंगलाय सोहळा... !!
आषाढीचे वेध मज लागले हरी
पुण्य काही साठवावे मी परोपरी !
विठ्ठला मी तुझा वारकरी आगळा
चंद्रभागे तिरी रंगलाय सोहळा... !!
©️🍁 *अलका कुलकर्णी* 🍁
अप्रतिम !
उत्तर द्याहटवाअप्रतिम काव्य !
हटवाअप्रतिम !
उत्तर द्याहटवा